Hochmuet

LUEGINSLAND: Summer, Sunne, Meer

Friedel Scheer-Nahor

Von Friedel Scheer-Nahor

Sa, 19. August 2017

Kolumnen (Sonstige)

Was gits Scheeners wiä im Summer an s Meer fahre, s Zält ufstelle, in d Sunne liege un de Härrgott e guete Mann sii loo? Sofort ghejt d Lascht vu aim ab un s Fülenzer-Läbe fongt o. Drej Woch hemmer vor uns, wu mir nit wiä üsruehje, läse un e wing Rad fahre wen.
Do goht näbe unserem Zält e Mords-Theater los. E Biäbli, wu hechschtens in diä dritt Klass goht, deeberet un bäffzget: "Nicht einmal zwei Balken hat das Internet hier und kein LTE. Wie soll ich denn hier den Urlaub überleben?" D Wuet funklet em üs de Aüge un s benimmt sich wiäs Rumpelstilzli kurz bevors in Bode fahrt.
Mir luege uns o un miän schmunzle. Sowitt ischs kumme, dass so ne Siäch sich nit emol meh am Meer fraie kann oder Luscht het uf Entdeckungsreis z guh? Nur guet, dass mir uns nit mit so ebbis rumschlage miän.
Z Obe deno hol ich mi elektronischs Biächli rüs, wu ich kurz vorem Urlaüb alles drufglade hab, was ich in de nächschte Zitt so läse will. Ich hab immer noch e gherige Graddel, wenn ich dro denk, dass des alles zsämme nur de Platz vume schmale Bändli brücht un ich doch e ganzi Biächerej debii hab. Ich schalts ii un fang a z läse. Do kunnt uf aimol e Meldung: "Ihr E-Reader muss aufgeladen werden." Aü des noch. Ich suechs Kabel un finds nit. Üseme guete Grund: S lit deheim in de Schublade. Do packt mich e Wuet. Am liäbschte dät ich des Glump vume E-Reader grad in d Ecke pfäffere. Nix zum Läse. Was soll denn des fir e Urlaüb sii?
Do fallt mr s Biäbli vu hit Nommidag ii. Hochmuet kunnt vorem Fall, denk ich. Un nimm mir vor, dass ich s Meer, d Sunne un d frisch Luft diesmol ganz bsunders äschdimiäre will.