Fliege chönne

LUEGINSLAND: S git so Träum

Markus Manfred Jung

Von Markus Manfred Jung

Sa, 14. April 2018

Kolumnen (Sonstige)

S git so Träum, wo all emool widerchömme, eim noochgöhn dur s ganzi Lebe dädur. Dass i vom Himmel obe abeschtürz, direkt neben em Chilleturm vo St. Bonifazius z Lörrech, won i glehrt ha, Minischtrant z sii un Luusbueb gliichzittig. De Bode chunnt all nööcher, un wo s tätsche sott, wach i uf. Oder all die Verfolgungsträum vor Prüefige. Un well mi nie son e Verfolgerchaib verwütscht hät, -wider bin i im letschte Moment ufgwacht-, han i die Exame chönne aagoh mim beschte Gfüehl un ha si packt. De schönscht Traum isch aber selle, won i fliege cha. S traumt mer, i nämti all miini Chraft zämme, heb d Luft a, mach Füscht, press Spannig in ganze Liib, -un uf eimool lüpft s mi vom Bode, zerscht e bizzi bloß, aber i schweb. No goht s all ringer un däno flieg ii, e ganzi Rung lang, un i bi so liicht un über allem Schwere dört unte. Eigentli bin i sicher, dass i des scho wirklich erlebt ha, dass i des cha, wenn i s numme will. I spür s, i ha s i mer din. Bloß, worum probir i s grad nümm?