Wenn Sie sich diesen Artikel vorlesen lassen wollen benutzen Sie den Accesskey + v, zum beenden können Sie den Accesskey + z benutzen.
14. Juli 2012
LUEGINSLAND: Schuel-Mundart
Mit em Landesprogramm http://www.mundart-in-der-schule.de chunnt mer in e mänggi Schuel go vortrage, verzelle, mit Schüeler schwätze, zum Bischpil über d Muetter-Sprooch (dütsch, albanisch, serbokroatisch, alemannisch, türkisch, italienisch…) oder über s Problem: sich schämme für si Sprooch, usglacht werde oder stolz si druf. Hintenooch isch mänkmool no Zit, dass die junge Mensche, mit e bizzi Hilf, e eigene Text schriibe, uf Alemannisch: e Gedicht, e Gschicht. Zmeischt hän si e Mordsfreud, we mer vorher sait, si chönnte so schriibe, wie si wötte, es gäbti kei Alemannische Duden nit, un si müeßte s numme vorlese chönne hintenooch, dä eigni Text.
Doletschti, z Steine am Schuelzentrum, hät de Fümftklässler Philipp am End vo de Doppelschtund si Gschicht "Das Komsche Gasthus" vorglese. Si fangt eso aa: "Gesten bin i durchs dorf gsecklet. Ufeimol han i hunger grigt un ha mir a Gasthus gsucht." Vorglese hät er s im e einwandfreie Alemannisch. Däno hät er wiiter vortrage, wie dä Ich no gschnell Chirsi klaut un däno in de Wirtschaft sich d Charte bringe losst un "a schnitzl mit a ba fritte bstellt und a Gurke salat". Er hät lang warte müeße, no isch s Esse choo un er hät de Kellner gfrogt: Hän si kei Dildo? Jessisnei si mir, d Lehreri un ii, verschrocke. In de fümfte Klass! Un fascht d Hälfti vo de Chinder hät au glii gchitteret oder gar uusebrielt vor Lache: e Dildo! In de Wirtschaft! Bim Esse! Fascht vergelschteret hät s de Philipp nomool vorglese. Un jetz hä mer verschtande: "als dan endlich de salat ko isch ha i zum Kelner gsait han sie kei dill do." Aber wer rechnet scho dämit, dass e Fümftklässler des Wort (un des Gwürz) "Dill" chennt? Übrigens, s Gschichtli hört eso uf: "Am schluss ha i no zum Kelner gsait. Wenn dumheit zum wachse füre würd könnte sie us em dachkerndel suffe. Dann ha i zahlt un bin mit Ranzepfiffe heim"
Werbung
Autor: Markus Manfred Jung
