Bisch dü Do?

LUEGINSLAND: Unsinnigi Froge

Friedel Scheer-Nahor

Von Friedel Scheer-Nahor

Sa, 26. Mai 2018

Kolumnen (Sonstige)

S isch schu e Zitt her, do het sich e Bekannte üs de Kölner Gegend driber luschtig gmacht, dass er bi uns immer emol wieder mit "So, bisch aü do?" begriäßt wird. Bleder, het er gmengt, kinnt mr sich nit begriäße. Wenn er dere Person gegeniber stoht, ischs doch klar, dass er do un nit amenort anderscht isch. Ich honem miäße Rächt gää, dass es tatsächlich e Frog isch, wu uf de erscht Blick usinnig isch. Aber trotzdem isch sie mr liäb un fir ebbis guet. Mit sonere Begriäßung sait mr nämlich gonz näbebej noch e Hüffe, was mr vum Härze här weiß, wemmer in de Sproch deheim isch. S soll am ondere z vestuh gää, ich hab dich gsähne un ich frai mich driber, dass mir zwei uns träffe.

So isch aü friähjer schu meh wiä diä lütrige Wort gmengt gsi, wemmr zue veschiedene Glägeheite e Sprichli parat gho het. Wemmr bejspielswiis ebber bim Maihje otroffe het, het mr gsait "Haütses?", oder wenn d Nochbere am Haie gsi sin, isch bim Vebejguh griäft wore: "Nit gar z streng!" Sin zwei zsämmegstonde, isch de Dritt dezue gloffe un het gsait "Hener guete Rot?" Mr het gluegt, was diä ondere schaffe un het e Afong zueme Gspräch gsuecht un gmocht. S isch eifach e Formel fir ebbis, wu mr üseme guete Wille rüs sait un de Zsämmehalt in de Gmeinschaft gschmeidig macht. Un genau wege dem frai ich mich, wenn ebber uf mich zue kunnt un sait: "So, bisch aü e wing do?" "Jo", sag ich deno, "un dü?"