Wenn Sie sich diesen Artikel vorlesen lassen wollen benutzen Sie den Accesskey + v, zum beenden können Sie den Accesskey + z benutzen.

04. Februar 2012

LUEGSINSLAND: Dipflischisser

Dr Ding isch as Dialäkt-Pabscht bekannt. Bi däm kasch fascht nyt rächt mache. Wänn dr do saisch: "Des isch säli Fraü, diä bim Beck schafft!", no dänkt er: falschs Relativpronome, s mueß heiße "wu bim Beck schafft". Oder wänn eber singt "In Mueters Stibili", verdrillt er d Auge un sait: "In s Mueters Stibili". Wänn dr saisch: "mini Hand", meint er: "Im Oberrhiin-Alemannische heißts eigentlig mi Hand". Däm falle Dipfli un Komma uf, wu fähle oder z viil sin, un wäge däm nännt dr Volksmund esonigi jo aü Dipflischisser. - Falsch! Scho wider ebis nit rächt! Wänn er des dät läse, dät er sage: "Volksmund isch e hochditschs Lehnwort, bi uns miäßts eigentlig "Volksmüül" heiße!"

Däm si Dipflischisserei goht eso wit, ass e baar scho vergelschteret sin un meine, si miän sich entschuldige. S Helga zum Biispiil het emol zuenem gsait, ass äs kei Dialäkt rächt ka: s isch hinterem Schwarzwald uf d Wält kumme un ufgwagse un läbt aber scho lang am Tunibärg. Iberal, ebs hinterem Schwarzwald hinterwäldlerisch oder im Briisgaü vorderwäldlerisch schwätzt, iberal fallt uf, ass des oder säll Dipfli nit basst. Äs het sogar gsait: "Wänn ich mir sälber kennt Notte gä, gäbt ich mir e Fimpfer!" Do isch dr Ding verschrocke un het gsait: "Des derfsch doch nit ernscht nämme. Wenn eber e Zahnarzt alacht, dänkt dä doch aü zerscht: Aha, eins zwei distal Kompositfüllung; eins drei mesial ..."

Momänt liäbe Läser, s Delifon schällt grad. "Hallo, was gits?" - "Hier ist Frank Bohrer, Zahnärztekammer. Schreiben Sie bloß das nicht. Wenn uns ein netter Mensch anlacht, freut uns das, und sonst nichts! Der Zustand der Zähne ist da zehntrangig!" Ja, aber Herr Bohrer, bi mir, äh ..., bi sällem Dialäkt-Pabscht isch des doch aü nit anderscht!

Autor: Harald Noth