Lueginsland

Telefonzellen: Schwätze mit em Paul

Ulrike Derndinger

Von Ulrike Derndinger

Sa, 19. Mai 2018

Lueginsland

Des gäle Telefonhiisli am Roothus isch unser Spielplatz gsin. Spiiler hän mir Burscht viili ghet: Mir hän uns z dritt niidruckt un hän d Fiidle zämmepfetzt, dass d Tiier zuegange isch – un hän drno so arg glacht, dass mir nooch e paar Schnuufer im eigene Dampf gschwitzt hän. Mir hän d Sitte vum bibeldicke Telefonbuech wie e Duumekino surre lenn un hän bsunderi Nochnämme gsuecht: Wursthorn, Rübenkaiser, Mörder, sogar e Hitler hän mer gfunde. Mir hän de Heerer als Mikrofon in d Hand gnumme und hän niibabbelt: "Hitparade im ZDF! Jetzt aus der Telefonzelle an der Hauptstroß!" S beschte Spiil awer sin d Anruef gsin bi de internationale Telefonuskunft, wu echti Litt Antwort gän hän. Ganz fir umesuscht. "D Nummer vum Paul McCartney vun de Beatles hätte mir gern. Us England", hän mer mol gsait. In de Leitung hets kruschtelt un eweng ghieschtelt. "Sie glauben doch nicht, dass ich Ihnen diese Nummer herausgebe?!" Oh, doch, ei Sekund hän mir lang dran glaubt, wirklig. Mir un de Paul in dere Zell. Hello un adje un mir sin Fäns! Bis hit denk i dran, wie ich viellicht nur e Muckeseckeli witt weg gsin bin vum e Schwätzli mit einem vun de Beatles, do am Rothuus, do in unserm Dorf. Un ganz umesuscht.