Erbersorte

LUEGINSLAND: Allwil greeßer

Wendelinus Wurth

Von Wendelinus Wurth

Sa, 13. Juni 2020

Lueginsland

Si kinne gar nit groß gnue sii – d Erber. Un si hen natierlig bloß Vorteiler: Bim Zopfe sin d Schale schneller voll un mr isch bälder fertig, bim Abwiige-n-au un sogar bim Esse geht s schneller. Si sin eso groß, die neji Sorte Erber, wie e manicher Apfel friehger un e manicher Apfel isch hit eso groß wie e kleini Kirbs. Si sehne schiin us – un s Au isst jo allewil mit – do ka-mr schun emol driwer wegluege, ass de Gschmack nit allewil Schritt halt, e maniches Mol gar e wing wässrig un vil z schnell vefloge-n-isch.
Degege sin d wildi Walderberle winzig. Mr mueßt sich au tiefer bucke, wil d Steck nit eso hoch wachse. Un wil si eso vil kleiner sin, mueß mr si untrem griene Laub regelreecht sueche. Un ufpasst, numme wenn si dunkelrot sin un ke wisses Ärschli meh hen, sin si zitig. Nor het sich s Sueche rentiert: Jedes einzelne in s Mul gsteckt un zwische Zung un Gume vedruckt – was fir e intensiver Gschmack un – er bliit lang, er haltet aa.
Un jetzert, wu mr wege m Corona jo zimlig de Zit het, ka-mr sich jo ufmache un in Wald gih un wildi Erberle semmle – zum Erberschlecksel mache, vun dene wilde … wenn s numme nit eso vil länger giengt, wege m Schnaike, wil si eso guet schmecke, …