Vergessenes Esse

LUEGINSLAND: Fotzelschnitte oder Gschwellti

Markus Manfred Jung

Von Markus Manfred Jung

Sa, 16. November 2019

Kolumnen (Sonstige)

Am vergessene Esse chasch messe, wie guet s is goht. I mein jetz nit sell, wo mer tonnewiis in d Tonne schmeiße. I mein des, wo mer hüt Arme-Leute-Essen däzue sait. Sell, wo uns als Chinder so chaibeguet gschmeckt hät. Alts Brot isch nit furtkeit worde, do hät d Mutti Fotzelschnitte drus gmacht oder Arme Ritter, wie andri gsait hän däzue. S Altbacheni in Milch dunkt, won e Eili drin verchlepperet gsi isch un e bizzi Zucker oder Vanillzucker driigrüehrt. Un die iigweigte Schnitte guet in Butterschmalz aabroote. Mmmmh. Un hät s däno no Zwetschge- oder Öpfelmues gää däzue, vo mir us no mit Zucker un Zimt, no si mer scho richtig riichi Ritter gsi. Oder Vogelheu. Do hät mer s Brot zerscht aagröschtet, däno Öpfelschnitzli däzue gää, mit Zucker überschtreut. Un hät s däno e bizzi karamellig düftelet, hät mer d Hitz abegreglet un d Eierzuckermilch däzuegleert un aaschtocke glo. Un natürli hät s au do am End Zucker un Zimt drüber gä für uns Schleckermüüler. Oder Gschwellti mit Bibbelis-Chäs. Selle no vom Wiiß-Chäs us de suure Milch un no nit vom Quark wie hüt. E bizzi Milch zum Verdünne, Schnittlich drii, Salz, Pfeffer un was mi agoht no gern e Zinke Chnobli. Heieiei, un des uf die ganz heiße Gschwellte. Sin d Härdöpfel no jung, gern mit Schale. Hüt, wo s is viil besser goht, nemme mer ehnder Chäs. Münschter us de Chäs-Chuchi z Gerschbach un selbergsuechte Chümmi us em Jura. S lauft mer grad s Wasser zämme im Muul. S Dradenke ällei scho äschtimiert mer d Gschmackszäpfli im Hirni, d Gruchszäpfli, Erinnrigszäpfli: Glückshormon, Serotonin gege de Hunger vo de Leeri vo de z volle Ränze un vor em eigentli scho Sattsii, bivor d Erinnrig Hunger hät.