Gloubel Willidsch

LUEGINSLAND: Nit anderschter as wie im Dorf

Wendelinus Wurth

Von Wendelinus Wurth

Sa, 09. November 2019

Kolumnen (Sonstige)

Mir uf em Dorf wisse jo schu lang, ass d Welt e Dorf isch. Was wen die uns sage, wenn si vum Gloubel Willidsch rumschwadroniere? Ass es iweraal isch wie bi uns im Dorf? Wen nor desdrum alli zerscht in d Städt, un wenn si lang gnue dert gsi sin, wider zruck in s Dorf? Nemme mr d Politik: Mittlerwil isch es jo so, ass die, wu am allerlutschte schreje, d meischti Ahänger (Follouwer) kriege, nit vil anderschter as wie manichmol im Dorf. In de Politik wurd vil hinter de Kulisse usbaldowert, wu mr gar nix devu mitkriegt. Uf em Dorf sait mr nor do wurd gmuchelt – oder au si mache s hinterum. Mr het s awer nit gern, wenn s muchelt, wil des jo heißt, ass es e Gschmäckli het. So solle vili alti Vorständ ihr nejer Vorstand voher hinter de Kulisse zammestelle un d Mitgliider derfe hintenooch brav driwer abstimme, ganz demokratisch. Desch desdrum komisch, wil d Lit vornerum jo allewil sage, ass si die Lit am liebschte hen, wu gradus sin, also die, wu sage un au mache, was si voher akindigt hen. Un au sunsch isch es glich: S git Ehrekäsigi, die wu ebbis numme mache, ass es noochher in de Zitung steht. S mueß nit guet gsi sii, was si gmacht hen, hauptsächlig d Lit denke, ass ebbis gmacht worre-n-isch. Un bim e maniche Ehreamt wär s besser, mr tät ebbis zahle defir, un s isch nor reecht gmacht, wil numme reecht un schleecht halt nit guet un schu gar nit professionell isch. So gsehne isch es im Dorf nit anderschter as wie in de Welt.