D Modi

LUEGINSLAND: S kunnt (fascht) alles wider

Beate Ruf

Von Beate Ruf

Mi, 07. Oktober 2020

Lueginsland

Lang isch es e absoluts "No go" gsi, Tennissocke, sälli mit de blau-wiße Ringel, zöe de kurze Hose azlege. Jetz isch es wider hipp, rumzrenne wiä derteemol de Magnum. Mit de Jeans isch s e ewigs hin un her, Rehrlihose kumme un gehn, d Schlaghose isch au nit dot z kriäge un sitter e baar Johr gits fir diä junge Maidli "Mum-Jeans", so tailliehochi Hose, sonigi wu halt d Mama agha het wu si jung gsi isch. Nix meh mit freiem Blick ufs Arschgeweih un de Schtringtanga.

 Bi de Frisüre gits grad e Trend, wu mr nit eso rächt weiß, wurum der noch emol kumme isch: Deppepony het mr em gsait. Ganzi Generatione hän dodefir ihri Eltere ghasst, wil si sich als Burscht nit hän wehre kenne, wenn de Frisär oder ebber üs de Familie d Schere agsetzt het un schnörgrad – e manchs mol au nit – de Pony e göeti halbi Handbreit iber de Augebraue abgsäbelt het. Aber jetz isch er wider do, säller Pony. Äs sin meischtens jungi Fraue, wu des ganz freiwillig mache leen.
 E noch schlimmeri Frisüremodi hets aber nimmi in diä hitig Zit zruck gschafft, un des isch au wirklig kei Verluscht, dass s Minipli so göet wiä üsgrottet isch. Kenne nr Ejch erinnere? Fraue, mit Lockekepf so groß wiä gschmickti Pfingschtochse. Au Männer hän sich Leckli mache loh, si hän als üsgsähne wiä toupierti Köngigspudel, wu fir de Hundeschönheitswettbewerb frisiärt wore sin. Säller Kelch isch ammer vorbei gange, de Deppepony nit.
Hit, vili Johr denooch, hab ich Fride demit gschlosse, ich sag mr eifach, dass ich e Trendsetter gsi bin.