Gsunder Menschevestand

LUEGINSLAND: Glauwe oder denke

Wendelinus Wurth

Von Wendelinus Wurth

Sa, 17. Oktober 2020

Kolumnen (Sonstige)

Wemr de Eltre als ebbis vezehlt het, was nit so ganz haserein gsi isch, nor hen si gsait, wer s glaubt, wurd selig, un wer s nit glaubt, kunnt au in Himmel. Un was glauwe d Lit hit nit alles. Mr mueßt nit emol an de groß Trompierer denke, s langt, was mr eso jeder Taa durich mitkriegt. Do isch doch disletscht, wu-ni im Zuu ghuckt bin – mim Lärvli uf natierlig – e Frau näwe miner Rucksack ghuckt, mit de Mask unter em Kinn. Si isch hell un elegant azoge gsi un, wu noch e Pärli kumme-n-isch, het si gmeint, der jung Mann nimmt doch bstimmt siner Rucksack eweg un nor kinne si naasitze. Awer si hen nit welle, hen gsait, e Stickli stih wär gsund un tät ne nix usmache. Nor het si witergmacht un gsait, si tät hundert Johr alt werre, ihr Dokter hebt des gsait. Un werum?, het si witergmacht, wil si in Afrika gläbt het. Allewil mit de Larv unter em Kinn, trotzdem mr si dra erinnert hen, si ufzsetze. Nooch un nooch isch ruskumme, ass des Afrika schu 60 Johr her gsi isch un au bloß niin Johr lang. Un allewil het si iwer die Schiss-Mask gschumpfe, was numme gange-n-isch. Un was hätt d Muetter gsait, in so me Fall? De kaansch an si naschwätze, was de wit, s isch wie wenn de e Ochs ins Horn pfetzsch.
Uf de ander Sit het s als gheiße, denke isch Glickssach – drum sot mr s de Resser iwerlosse, wil si greeßeri Kepf hen. Des het ebbis, wil de gsund Menschevestand im Englische au horse sense heißt. Wenn des Denke bloß nit eso vil Zit tät bruche, bis mr weißt, was was isch – un so witer. Un was selli 85-jährig Frau im Zuu aageht – si het, schint s, liewer glaubt.