Lueginsland

Sodom: Im gliche Dilemma wie dämols

Friedel Scheer-Nahor

Von Friedel Scheer-Nahor

Sa, 19. Oktober 2019

Lueginsland

Als Kind hab ich diä Gschicht vu Sodom, wu si in de ganze Stadt nit emol zeh Gerechti gfunde hen, grüsig ibertriebe gfunde. Bi uns im Schwarzwald, so hab ich denkt, däts mit Sicherheit anderscht üssehne. Wemmer jetz aü nit gli springe un ame Gascht d Fiäß wäsche dät, wenn er unter de Dire stoht ... Aber Gwalt oodue? He, nai. Wiä guet – so han ich in minem kindliche Gmiät denkt – dass d Wält frejndlicher wore isch un dass de Härrgott kai Grund meh het, Fiir un Schwefel z schicke un de Soistall ei fir alli Mol ufzrüüme. Aber je älter ich wirr, desto meh Zwiifel kumme mir. Viellicht gohts bi dere Gschicht jo um ebbis ganz anders, nämlich do drum, dass es de Gsellschaft gar nit ufgoht, was fir e Urächt si oostellt, wil alli debii sin? Ibertrage uf hitt, kinnts do aü eng were. Denn Mord un Dotschlag isch aü schlimm, wenns gege d Natür grichtet isch, wenn Diärer un Pflanze üssterbe un d Umwält de Bach na goht. Mir hen uns iigrichtet im Konsumwahnsinn: Plaschtikschwemmi, Billigfleisch, Knickerpriis fir Milch, Obst un Gmiäs un glichzittig Veschwendung, Fliäge zum e Nasewasser, Aütofahre, wu mr guet s Fahrrad nämme kinnt, un Boie uf Dejfl kum rüs. De Hoke lit in de Bequemlichkeit un dass es fascht nit meglich schiint, de Rank z kriäge. Wemmer do gnaü hiluegt, het jeder Dräck am Stäcke. Viellicht sin diä in Sodom im gliche Dilemma gsi, wil ihri Bosheit eifach so normal gsi isch? No sotte mr jetz aber emol de Muni bi de Herner packe un d Lehr drüs ziäge.