Lueginsland

En eizigi Hoffnig: De Zauber am Afang un End

Markus Manfred Jung

Von Markus Manfred Jung

Sa, 21. Juli 2018

Lueginsland

"Und jedem Anfang wohnt ein Zauber inne" hät de Hesse gsait in sim "Stufen" un so han i emool e Glosse agfange gha am Afang vom e neue Schueljohr. Ämend wohnt er aber au am en End, dä Zauber, "Der uns beschützt und der uns hilft zu leben". Was blibt noch öbbe guet sibetausig Unterrichtstäg as Lehrer in de Schuel un no drei übrigi vor eim? Lehrersii isch e Bruef, wo eim so zfride mache cha. Mer git öbbis, wo mer guet cha, wiiter an jungi Mensche, öbbis, wo eim wichtig isch. Wüsse, Chönne, e Lebensiischtellig, e freudvolli Haltig zum Lebe überhaupt. Mer schwätzt mitnand drüber, un zuegää, mer frogt ab un git Note däfür. Aber vor allem: Mer hilft junge Mensche, sich in dem verruckte Durenand-Lebe z finde, vor allem sellene, wo nebe s Gleis groote, worum au immer.

 Un Lehrersii isch e Bruef, wo eim fuchsteufelswild cha mache. Vor allem, we mer siht, dass mer nit ernscht gno wird. Won i agfange ha, isch unser BW e Muschterländli gsi in de Bildig, in de Spitz vo Dütschland un de Welt. D Lüt hän agfange Achtig z kriege vo de Lehrer. Bal virzg Johr un drei Deputatserhöhige ohni Lohnusgliich spööter, noch de Abschaffig vo de Leischtungsschtufe un vo de Altersermäßigung, noch de Senkig vom Iigangsghalt, noch em Iischtelligsschtop trotz em Lehrermangel überall, noch de Iiführig vo de Inklusion, vo de Digitalisirig un was weiß ich, un alles ohni Hilf, noch de "Verantwortungsstärkung und Freiheit der Schule", wo nummen e Mogelbegriff für meh Arbet ohni Unterstützig isch un un un... Mit de schäbige Entlassig vo agschtellte Lehrer un Referendar vor de Summerferie un vom neu Benutze vo däne junge Mensche hinterher: wirtschaftsbschtimmti Politik ohni Sinn un Verschtand, d Bildigspolitik vom Land. Die einzigi Hoffnig: S git no jungi Lüt, won e Freud dra hän, öbbis wiiter z gää, wo si guet chönne.