Lueginsland

Linzertorte: Wär bacht diä bescht?

Friedel Scheer-Nahor

Von Friedel Scheer-Nahor

Sa, 02. Dezember 2017

Lueginsland

Nit alles, was Linzertorte heißt, het de Namme vediänt. Des mengt uf jede Fall de Toni. Un er het Erfahrung. Si gonz Läbe het er immer emol wieder sone Güzkueche vu ander Litt vesuecht. Aber keiner isch bis jetz an sine dro kumme. Keiner isch so wiä siner, mit de exakte Mischung vu Butter, Mehl un gmahlene Mondle, mit em richtige Sprättli Gwirz un natirlich mit eme großzigige Sprutz Griäseschnaps. Nit nur de guet Gschmack, nai, aü dass er als Mann nostoht un Sticker zeh Linzertorte bacht, bringt ihm viel Bewunderung ii. Nur eimol isch em ebbis passiert, was nit ins Bild passt het. Do het ihm e Nochberi e Linzertorte vu sich gschenkt. Er het sich bedankt, het dem Kueche aber gli agsähne, dass er nit taugt, un het e schnuerstracks witerveschenkt - an e arme Schlucker, wu sonigi Schleckereje nit all Dag het. Uf d Frog, wär de Kueche bache het, het de Toni gsait, si Fraü. D Nochberi, het er jo schlächt ins Spiel bringe kinne, un sälber? So egal isch em si Ruef aü wieder nit gsi. Jetz isch der Mann aber dermaße begeischteret gsi, dass er immer wieder devu gschwätzt het. Noch niä häb er so e gueti Linzertorte gässe. "Wart", het de Toni denkt, "dir zeig ich, was guet isch", un het em eini vu sine brocht. S nächscht Mol, wu si zsämmkumme sin, het ere gfrogt, wiäs ihm gschmeckt het. "He," het der iberzwärch Kärli gmengt, "s isch schu rächt gsi. Aber s gluschtet mi halt immer noch nach dem Güzkueche vu dinere Fraü. Wenn dr mr so ain nomol hättsch, dätsch mr s grescht Chrischtkindli mache."