Lueginsland

De Schlattlochbuur: Ruuchi Bolle

Markus Manfred Jung

Von Markus Manfred Jung

Sa, 22. April 2017

Kolumnen (Sonstige)

"Ruuchi Bolle" hät de Gedichtband gheiße, wo de Günter Wagner us em obre Chandertal vor über 30 Johr uusegä hät. E ruuche, chnorzige Stotze isch er selber gsi, dä Dichter, wo si Läbtig "uff em Wälder" glebt hät, so, wien er s in siine Vers vo sich sait: "Bi üs uff em Wälder/ isch dr Bode so ruuch./ Dr Mensch isch wie d Fälder./ E uralde Bruuch.// Doch vo inne im Chärne/ chunnd vo beed öbbis use./ De merksch es bim Ärne,/ de schbürsch so ne Bruuse.// Vor em Ärne chunnd s Saije/ un dr Champf mid dr Scholle./ Bim Eege un Maihje-/ findsch du ruuchi Bolle."

Als "Schattlochbuur" hät er s Chrampfe um jedi Ernt in über 900 m Hööchi gchennt, er isch e Naturmensch gsi un eine vo däne, wo gege d Umweltverhunzig vorgangen isch, wie si Fründ, de Manfred Marquardt. Er hät harti Vers gschribe un dütlichi Wort gsait, wo mer uf sim Husberg Blauen e hundert Meter hooche Sendemascht drufbetonirt hät. Er hät gchämpft mit alle Mittel dägege. Was des heißt, wüsse numme wenigi. Stur isch er gsi, nie meh uf si Lieblingsberg uffe, siter de Sender gschtanden isch.
Über viili Johr hät er d Alemannegmei zue sim "Marzeller Nuß-Obe" iiglade: "Mir richte: Neue Wi, Burebrot un Nüss. Alemannischi Gedicht trage vor..." Viilen isch er e treue Fründ gsi. Mit 87 hät er jetz goh dürfe us dem ruuche, schöne Lebe, begleitet vo siine Liebschte un sim letschte Gedicht "Letzte Seite" us sim Buech: "Wänn i emol dod bi,/ un dr Pfarrer verzelld,/ i wär numme Mensch gsi,/ pfiff i uff dr Held."